طبیبیم دردمندم طالب درمانیوام گل گل
مریض درد عشقم ، خسته هجرانیوام گل گل
کرم قیل التفاتون کسمه ای شه ، بینوالردن
گدایم بینوایم ، سائل احسانیوام گل گل
خمار باده عشقم منه رحم ایله ای ساقی
وفا بزمنده محتاج می عرفانیوام گل گل
مسلم نیلورم ، وئردیم حیاتون چشمه سین خضره
بقا سر چشمه سی سن سن سنون عطشانیوام گل گل
گئجه گوندوز ایشیم آه و فغان دور ، درد هجروندن
ترحم قیل خیال وصلیله حیرانیوام گل گل
اورکده لاله تک هجرون چکوبدور داغی ، داغ اوسته
الا ای باغبان رحم ائت یانان ریحانیوام گل گل
بهشتیم گلشنیم باغیم گلستانیم گلیم ،سن سن
خوشام بلبل لرون جمعنده مدحت خوانیوام گل گل
امیدیم عزتیم عشقیم جلالیم شوکتیم، شانیم
حبیبیم، دلبریم ، جانیم ،بلا گردانیوام گل گل
تولا ملکونون سلطانی سن سن ایندی احسان ائت
بو مسکین و گدایه ریزه خوار خوانیوام گل گل
جهاند ا اهل عالم لطفیوه محتاج دور ای شاه
نه تک من مستمند دولت غفرانیوام گل گل
اگر چه قابلیت یوخ اولام درباریوه دربان
ولی لطف ایله ای شه خادم دربانیوام گل گل
اوزومده گورمورم اقبال اولام درگاهیوه خادم
تفضل ایله سن جارو کش ایوانیوام گل گل
تعال الله تعال الله عجب لطف ائتموسن احسان
که بنده سویلو اوز مولاسینه قربانیوام گل گل
باش ایسته ای باشیم تاجی سنه جانیم فدا اولسون
ندور باش مین جان اولسا تابع فرمانیوام گل گل
سن اقلیم ولایتده شهنشاه فلک شوکت
قبول ائدسن غلا بی سر و سامانیوام گل گل
تیکیبدور گوز یولا بیر عمر دور شب خیز یول گوزلر
گوزون قربانی ای گوزلر گوزی قربانیوام گل گل